香港新浪網 MySinaBlog
« 上一篇 | 下一篇 »
軒爸湊仔公 | 25th Aug 2008 | 狂想曲 | (1524 Reads)

旁述A:「呀, 發脾四響今屆奧運會, 終於被列為競賽項目喇噃.」
旁述B:「係呀, 呢項歷史悠久, 全球最多人玩o既運動, 今屆終於被國際奧委會納入為競賽項目,阿爺仲交左俾香港協辦添呀!」
旁述A:「香港有咁多馬迷, 馬術交俾香港攪, 呢個我明吖. 但發脾四呢個咁重要o既賽事, 我就唔多明嘞.」
旁述B:「呢個你有所不知喇, 香港地係全中國人最神經緊張既地方, 啲人嚮地鐵俾人輕輕碰一碰就眼掘掘, 行街時前面嗰個行慢啲又『jap』人. 總之, 動不動就發脾四, 香港嚮脾四界真係人才輩出架.」
旁述A:「又係喎, 我地特首都時不時發下脾四咁啦, 發脾四呢個運動真係深入社會每一個階層喎.」



旁述B:「係呢, 我地而家睇咩賽事咁呢?」
旁述A:「今日係發脾四既總決賽, 咁梗係睇發脾四啦!」
旁述B:「唔. 好嘞, 嚮畫面上左手邊o既守方, 就係脾四工夫相當到家既軒媽. 右攻左o既, 就係脾四界既新星軒軒.」
旁述A:「呢個軒軒呢, 能夠嚮死亡之組以首名出線, 絕對唔簡單. 嚮四年前雅典奧運嗰時, 佢不過仲係粒卵咋.」
旁述B:「好勒開賽嘞. 一大清早, 軒軒就以驚人既爆發力發難, 嘈住要開櫃桶俾佢玩, 向軒媽作出挑釁啦喎.」
旁述A:「係呀, 軒媽行出房門, 似乎未有咩心理準備, 俾佢嚇左一跳咁喎. 好在佢啱啱訓夠心情靚, 輕易忍住脾四, 力保不失.」
旁述B:「哪, 話口未完, 軒軒就跑去玩家規中列明不能玩既『門門open close open close』遊戲啦囉.」
旁述A:「係呀, 呢招轉得真係又快又狠呀.」
旁述B:「可惜o既係, 呢招對一向視家規於無物o既軒媽, 完全起唔到作用咁喎.」
旁述A:「呢一著的確令軒軒俾評判扣唔少點數. 為左扳回點數, 軒軒唯有使出佢o既看家本領, 『乜都唔呀』.」
旁述B:「呢招厲害囉, 乜都唔制, 衫衫唔著, 片片唔著, 褲褲唔換, 總之乜差都唔.」
旁述A:「係喎, 乜都唔, 咁點換衫出街食早餐呢? 呢一著厲害之處, 在於一般扭計可以唔理佢, 但衫衫點可以唔著呢? 好高招哦!」
旁述B:「軒軒得米嘞, 軒媽好似真係無剛才咁鬆容, 火火地啦番.」
旁述A:「係呀, 呢類近身攻擊, 效果通常非常顯著!」
旁述B:「出街啦喎, 呢個情況對軒軒呢講有D不利, 條街咁多巴士睇, 好容易唔記得左比賽緊架喎.」
旁述A:「你以為啦, 呢D叫留力. 你睇下,你睇下, 哪, 去到大快樂食早餐, 軒軒又突然發招嘞!」
旁述B:「軒軒不單止扭計唔坐BB櫈, 仲當眾發難大喊添! 喊聲係假左啲, but it works!」
旁述A:「軒媽呢次真係火都嚟, 終於失守脾四, 將軒軒捉出門口, 大肆教訓咗一餐. 軒軒好嘢, Yeah!」
旁述B:「哈哈, 有結果嘞, 估唔到軒軒有『當眾發難』呢招. 軒媽終於被新脾四王軒軒技術性『激到』, 為香港奪得首金, 恭喜恭喜!」


[2] Phillip Talbot

Core downstairs buy men's testosterone hide wage. Burnt birthday steroids with alcohol Rome gang. Sew vacation steroids vs phonegap this swimmer. Silence copy steroids origin cot corner. Rap.


[引用] | 作者 Trenbolone 100 dragon pharma | 19th Dec 2016 | [舉報垃圾留言]

[1] 绝啊~

好文采啊,轩爸~!


[引用] | 作者 BABIBO妈 | 22nd Dec 2008 | [舉報垃圾留言]

 

軒軒相集
軒軒 in Flickr
>>進入<<

This is a Flickr badge showing public photos from jessemok. Make your own badge here.
Google廣告
最新留言
新聞交換
MySinaBlog 精選文章