在超市, 你一手抱著孩子一手去買東西. 付鈔時, 狼狽地從袋口摸出幾張鈔票. 孩子見到鈔票, 嚷著要玩. 噢, 大件事, 不給他把玩一會兒, 他是不會罷休的. 而把玩的結果, 很可能是丟失, 又或「撕票」. 平日, 你可能會先和他角力一下, 講講道理. 然後突然高八度說一兩句完全無關的話, 引開視線, 優雅地解決問題.

不過, 因為收銀阿姐正一面不耐煩的睥著你, 所以, 你現在就要下決定了! 好, 鈔票有20, 50, 100, 500四個面值, 而你買的東西, 一張20元有找.

你要給他玩那張?

答案:給他玩500元那張吧, 20/50/100的流通量很高, 甚麼人也碰過, 很髒的.

... 縱然你知道那張500大鈔, 有機會變成兩張250小鈔.

有沒有試過給孩子餵飲水, 孩子死也不願意, 仲一手車開隻杯, 成杯水倒番了.

你想, 哼! 這孩子實在太不像話了.就在水柱散落到地下之前, 你已火起, 好想反手車番個死仔轉頭.

拍! 拍! 拍!...... (唔使報警住, 諗下啫:P)

你覺得飲多啲水有益, 飲多啲水又唔會死, 咁做乜唔飲呢? 太唔領情哪!

好啦, 就算唔飲, 洗唔洗車開先?

家陣又唔係唔識講野, 唔飲咪講囉, 使唔使車.

......

嗨, 朋友別動氣, 聽我講個故事先.

話說某夜, 我又準備餵軒軒飲水水.

忽然, 察覺到軒媽神色有異, 嘴咪咪咁.

我問乜事, 軒媽一臉難受咁話:「我eur咗啲酸野出嚟呀.」

嘩, 咁大鑊, 要急救喎! 我順手就將軒軒個水杯, 隊埋去軒媽個嘴度.

可能有啲嫌棄軒軒隻企鵝杯杯弱智, 佢閃開喎.

我又再隊.

又閃, 我又隊.

然後, 軒媽竟本能地......一 手 車 開 我!

她忽有感悟地說:「嘩, 原來俾人隊個嘴, 係咁討厭架喎!」

我唔多信, 即刻就俾軒媽拿著杯如是隊了一遍, 就信了.

唔... 到呢刻, 我覺得有啲寃枉咗個仔囉.

所以, 朋友, 下次你發現你老婆(或老公)隊你個仔仔或女女.

你唔使客氣架, 即刻搵個杯隊番佢, 佢一定有所頓悟.

唔頓悟就再隊, 包你可以並增進夫妻同親子關係.

放心, 佢會明o既一番苦心o既. (唔明別找我)

呢個假期, 打算找幾位老友記食飯.
今日本來入科學園, 但被甩底, 就先去調景嶺.

別誤會, 今次不是用走的, 是乘車去的.

今次找L君吃飯, 除了談談近況, 就是談他手上的iPod Touch.  一直想換PDA, 之前有人跟我說, 換PDA, 不如換部iPod Touch啦. 我知, 這台去掉了通話功能的iPhone, 當然依然很炫, 很好玩. 但, 它從沒叫自己做PDA, 它只是疑似PDA. 所以, 我一直好猶疑.

幸好L君是Apple的多年用家. 大家都知啦, Apple用家, 個個都好似Apple sale屎咁, 出晒力同Steve Job sell production, 兼夾服務態度仲一流加嘛. 所以, 我就有機會問過詳細了.

拿上手, 就玩了個Game, 搖下搖下咁玩, 的確很過癮. 更精彩是那個功能完整的Safari. 以這個大小的device來計, 似乎這是最接近完美的browser嘞. 當然, 市場上還有新秀G1入面的Chrome未玩過, 我猜那應該是唯一「有得Fight」的browser. 以娛樂角度來看, 我俾五粒星.

玩著玩著, 就來點實用一點的. 而呢方面, 我俾兩個「吓」佢.

第一個「吓」是, 跟機的Notepad, 竟冇得同PC sync. 咁簡單的功能都無, 實在十分意外.
而第二個「吓」是, 佢無Copy & Paste囉. 嘩, 近十多年來, 最偉大的發明Copy & Paste都冇?! 現在, 我們不都是靠Copy & Paste推動人類文明的嗎?

呢台iPod Touch, 就像個有型有款的猛男, 但係, 閹咗架囉.

唔怪得, 佢叫iPod, 唔係PDA啦.
看來, 我的換機計劃又要再擱置了.

咁啦, 一係舊機唔掉, 買多個猛男番屋企啦.