香港新浪網 MySinaBlog
軒爸湊仔公 | 30th Jul 2009 | 一般 | (443 Reads)

昂坪市集


愉景灣



愉景灣之格鬥篇



文化中心


九龍城碼頭


香港公園


道風山


梅窩


七一


大埔鐵路博物館


軒爸湊仔公 | 9th Jul 2009 | 一般 | (222 Reads)
現在的軒軒, 很愛包拗頸.

包拗頸的程度去到「極度不可理諭」. 不信? 大家先聽聽這段對話.

軒軒:「BB要食M&M.」
軒爸:「BB唔可以食咁多M&M, 蛀牙牙啊.」(軒軒兩歲多時, 已補了一次牙啦!)
軒軒哀號道:「BB想要食好多M&M!」

你可能會想, 小孩子要吃朱古力啫, 也不算包拗頸吧. 好, 那麼這個呢?

軒爸:「BB唔可以爬高.」
軒軒轉身, 便一掌推過來攻擊我.
軒爸:「喂, BB唔可以打人.」
軒軒大叫:「BB想要打爸爸!」

你可能會想, 小孩子只是有點自我啫, 也不算「極度不可理諭」吧. 好, 那麼這個呢?

軒爸:「爸爸俾呢本書書BB睇啦.」
軒軒:「唔該晒爸爸.」
軒爸:「BB唔使客氣.」
軒軒發飊:「BB想要客氣!!!!」

死未!

軒爸湊仔公 | 8th Jul 2009 | 一般 | (173 Reads)
軒軒:「我洗頭, 要太多泡.」
軒媽:「你呀, 亂up二十四呀.」
軒軒:「我亂up零...... 即係無亂up.」

軒爸湊仔公 | 25th Jun 2009 | 一般 | (288 Reads)
孩子三歲了,  最愛看門門開柵開柵.

這似乎是個怪癖. 還是個很僻的癖. 我很是擔心.

男孩愛巴士愛地鐵, 很正常, 唔僻. 但若只愛巴士地鐵的門門, 就很僻. 他無論坐巴士, 坐地鐵, 也都要霸個靚位, 買定爆谷睇門門開柵. OK, 我的低線是, 只要阿爸我有得坐, 其實也沒甚麼所謂. 愛看, 你就看個夠吧. 我雖不是門門, 份人其實也open的. (特別在夜店.)


只是, 孩子, 你就別在出地鐵時, 次次都堅持在月台留守到最後, 看完門門close至肯走, 尤其在人多多的時候. 我真的不太喜歡俾人「JAP」的感覺. 人地「JAP」完就走, 阿爸是無仇報的, 會好氣頂. 特別是被那個很阻掟的大嬸「JAP」. 被佢「JAP」完, 就好似將佢自己啲阻掟, 全數都過晒落我度咁. 我唔ok囉.

我真的不太喜歡俾人「JAP」的感覺.

孩子, 我也請你別在街邊的巴士站停下, 欣賞來來往往的巴士門開柵開柵. 你痴痴的看, 我就變了個痴漢. 孩子, 你知道嘛, 香港實在是個繁榮的大都會啊! 大都會, 巴士都是絡繹不絕, 是不會看得完的. 說句實話, 你阿爸的open是有條件的, 就是只能在那個open了冷氣的車箱之內. (若夜店沒open冷氣, 我會變得狂野.) 在炎炎的夏日之下, 讓人窒息的巴士廢氣當肺氣吸, 實讓我頭昏腦脹. 看著「門」門和這個「小」孩, 我只想到一個字. 「X, 睇完未?」

我想, 我人生最笨實的事, 除了結婚和生仔外, 應該就是置業, 而且還是在一個有十多條巴士線行走的巴士總站旁邊置業, 囉. (不好意思, 「夏日炎炎, 爆粗如夏蟬」, 罪過罪過.)

不過, 據說世間上也有好些小孩, 亦各有怪癖. 我就聽過有一個親友在小時候, 居然怕樹影. 大鑊是, 佢細時仲係嚮樹影婆娑的農村長大添, 成日都要避樹影, 真係玩死佢阿媽. 所以, 對於這門門怪癖, 我的態度是: 「既然有癖也不是很僻. 那麼, 這癖雖僻, 其實也未算僻.」(我講緊咩?)

軒爸湊仔公 | 24th Jun 2009 | 一般 | (269 Reads)
孩子三歲了, 最愛睡前聽我讀書.

不巧, 這也是我一天裡面, 最愛的工作. 我倆真是情投意合.

不過當我做咗成日野, 倦到企響巴士都訓得著時, 我很難再說那還是我所熱愛的. 因為, 那將會是一個比爬喜瑪拉雅山還艱鉅任務. 爬喜瑪拉雅山, 起碼可以選擇一睡不起.

你以為這差事可以敷衍了事嗎? 賤格! 對著一個如此天真的孩子, 你良心過意得去嗎? 我得, 不過問題不在這裡. 問題是, 這孩子每每能聽得出我讀錯了那些字, 強迫我把那個字再讀一次. 更攞我老命是, 個死仔又唔話俾我知邊度讀錯喎, 要我自己找碴. 若真的找不到, 就開始喊, 以呼喚「軒媽獸」出來鑿我個頭. 天呀, 這簡直就是情報組織所用的手段呀! 「嗱, 我地而家掌握咗你好多證據. 你做過咩, 你自己心知肚明, 乖乖地自己講出嚟, 再唔講就用刑! 我鑿, 我鑿, 我鑿鑿鑿...」


「啊......」(慘叫聲!)

這到底是虐囚, 還是虐老呢? 老老實, 有誰知道那裡可以報名去喜瑪拉雅山. 去喜瑪拉雅山, 就算瓜咗, 起碼是個成就.

不過, 連喜瑪拉雅山也敢去的我, 當然富冒險精神. 所以, 我偶然還是會膽駁膽, 以身試法, 故意讀錯一些字, 好測試下孩子的精神狀態. 如果他沒發現讀錯, 那代表他已眼訓到不行, 只是在死撐. 這時, 就可實行「跳頁閱讀法」, 多數不會給逮著個正. 50頁書, 會變了成5頁書, 哈, 我就不用想念喜瑪拉雅山了, 可以留點精神, 留點時間, 跟嬌妻玩玩「起碼拉下衫」.

軒爸湊仔公 | 23rd Jun 2009 | 一般 | (264 Reads)
孩子三歲了, 最愛問是「因為咩事?」.

「電車好慢, 因為咩事?」, 「爸爸食粥, 因為咩事?」, 「斧山嬉水池好遠, 因為咩事?」.

問題那麼尖銳, 除非你是官, 懂得答咗等於無答, 否則, 你都得花點心思, 才答得上半句.

不過, 不會答, 也不是因為我們太蠢, 反而是太有智慧. 明明有簡單的答法, 我們偏想得太「正確」, 並以為那是教仔的絕佳機會, 意圖答出一大堆歷史原因, 文化背景, 政治考慮, 科學分析, 哲學邏輯. 講真, 你鬼識. 「嬉水池好遠, 係因為屋企附近無囉.」


要是你真的想不出答案, 那千萬別逞強, 胡亂編個大話混過去. 他們可是會牢牢記住你的答案的.  你答說:「爸爸食粥, 因為無錢食飯囉.」他會記住自己有個窮爸爸的. 那並非事實呀! 那並非事實呀! 只要夠長命, 005一定可見家鄉的. 爹, 娘, 毛主席也會騙我, 005是不會的.

只是, 有時對著一個如此無知的人仔, 好難忍住不撒謊, 不"撚化"佢, 透支一下你的Credit. 特別是工作壓力龐大時, "撚化"細路, 我保證是個減壓良方, 好過唱K或索K. 例如, 你可以指著得一盞車頭燈的電車說:「BB, 電車得一隻眼, 睇唔清楚條路, 咪行得慢. 其他車車都有兩隻眼, 咪快囉.」 看, 港式的無厘頭文化, 就是這麼一點一滴的承傳起來. 而孩子的智慧, 也是這麼一點一滴的, 給你"撚化"(撚-plify)了囉.

軒爸湊仔公 | 5th Jun 2009 | 一般 | (172 Reads)
自四五月開始, 市場不斷出現利好因素, 當中有取態投機的兩大爬蟲基金:「大諤基金」和「烏龜基金」 亂Q咁入市, 又有特首以「代表論」干預市場運作. 與此同時, 以「良資」見稱已故中共領導人亦以老本大手入市, 向市民大派定心丸, 以致昨日維指一口氣升穿150,000. 但回顧過去二十年, 大市似乎多在低水徘徊, 所以, 在一個如此大的升幅之下, 大市的沽壓依然強勁, 市民不應掉以輕心. (閱讀全文)

軒爸湊仔公 | 7th May 2009 | 一般 | (292 Reads)
跟軒軒說的床邊故事, 一般分為三種.

一種是恐佈故事, 例如, 若那天軒軒爬高爬低, 跌襯. 那晚, 我就說一個關於一班ABC字母爬高爬低, 跌襯, 並跌個稀巴爛的故事. (有點像這個)

一種是Number的故事. 故事內容沒甚麼所謂, 反正軒軒愛Numbers. 只要有Number做Character, 再加點軒軒喜愛的東西就行了. (例如, Numbers在玩具反斗城開Party.)

一種是胡扯的, 這個嘛, 很難解釋, 但主要不是說給軒軒聽的, 自娛性質多點. 昨夜就說了這個:
----------------------------------
在很久以前, 有一個間很小很小, 賣小食的小店舖.
店舖雖小, 卻有很多小食賣.
有辣辣魚旦啦, 有炸薯餅啦, 有煎釀三寶啦.
不過, 他們看來都髒兮兮的, 只有燒賣比較齊潔.
因為, 他是用「蒸」的.
天生有潔癖的他, 對此感到十分驕傲和自負.


不過住在蒸籠內的他, 就像井底之蛙, 不知道小食店裡原來有比他更乾淨的小食.
他就問見多識廣的蒸氣生先:「蒸氣蒸氣, 呢個小食店裡面, 邊個最乾淨?」
蒸氣答:「是腸粉, 住在你蒸籠旁邊的腸粉. 他也是用「蒸」的, 而且又白又滑, 完美無暇. 就像Apple的產品一樣.」
燒賣一聽, 非常震驚, 並對腸粉起了嫉妒之心.

燒賣為了成為小食店裡最乾淨的小食, 他決定隔著蒸籠, 向腸粉撒個謊.
燒賣告訴腸粉, 像他這種沒有內涵的小食, 是賣不出去的.
他必需加些豉油甜醬辣醬麻醬芝麻. 仲要加茄汁. (軒軒愛茄汁嘛.)
單純的腸粉聽了, 非常感激燒賣的提點, 就央求小食店的老板, 為他加點醬.
老板心想反正早晚也要賣掉他, 亦照做了.
如此, 壞心腸的燒賣, 終於成為最乾淨的小食了! He did it!

沒多久, 有一個媽媽帶著他的孩子來到小食店, 想要五蚊腸粉.
這時候, 那孩子喊到:「媽媽, 要燒賣!」
機警的老板襯機促銷:「係囉, 要啲燒賣囉.」
媽媽:「唉, 好啦好啦.」
然後, 老板說:「你介唔介意, 啲燒賣同腸粉放埋一齊咁呢?」

(完)
-----------------------------------------
呀, 這個故事該叫甚麼名字好呢? 就叫「白雪腸粉」吧!

軒爸湊仔公 | 25th Apr 2009 | 一般 | (160 Reads)

軒軒痾屎屎痾了好一會, 姐姐問:「軒軒, 痾咗幾多條屎屎呀?」
軒軒站起, 看看屎塔, 有兩條喎, 仲成交叉狀. 想了想, 就答:「痾咗個加號.」
(圖片欠奉, 你不會想看罷?)


軒爸湊仔公 | 16th Apr 2009 | 一般 | (254 Reads)
軒爸:「嗱, BB玩水水玩到濕晒, 爸爸就嬲BB.」(黐線, 唔濕邊叫玩水.)
軒軒:「爸爸媽媽嬲BB, 之後BB就嬲爸爸媽媽.」

軒媽:「BB, 你鍾意海洋公園定廸士尼?」(上星期一口氣去了這兩個地方)
軒軒:「廸士尼.」
軒媽:「咁, 你鍾意廸士尼定科學館多啲?」(昨天又去了科學館)
軒軒:「廸士尼.」
軒媽:「哦! 咁你鍾意廸士尼定梅窩沙灘多啲?」(新歡"廸士尼"誕生了, 要出動軒軒的舊愛"沙灘"嘞)
軒軒:「廸士尼同沙灘.」(軒註:媽, 新歡舊愛, 不能共存嗎?) (父註:這個我知, 當然不可以.)
軒媽:「咁如果淨係可以去一個地方, 你會去廸士尼定梅窩沙灘?」
軒軒:「廸士尼沙灘.」

Next

軒軒相集
軒軒 in Flickr
>>進入<<

This is a Flickr badge showing public photos from jessemok. Make your own badge here.
Google廣告
最新留言
新聞交換
MySinaBlog 精選文章